Í blaðnum hesa ferð:

Í blaðnum hesa ferð er eitt sindur av hvørjum. Ein hugalig samrøða er við trý læraralesandi, sum øll ganga í fótasporum fedranna, tá ið talan er um yrkisleið. Tey prýða permuna á blaðnum hesa ferð.

Samrøða er eisini við Sjúrð Ravnsfjall og Jens Mortan Rasmussen, sum eru kt-vørðir. Teir lýsa støðuna, nú kt-vørðir ikki longur sleppa at loysa kt-trupulleikar í skúlanum.

Umrøða er av Harmut Rosa og resonansnámsfrøði. Tað er Dorthe Pedersen, ráðgevi á Próvstovuni, sum hevur skrivað umrøðuna av einari tí mest týðandi røddini innan samfelagsviðurskifti í vesturheiminum.

Yrkingar gera undirvísingina gandakenda. Tað heldur Durita E. Olsen, lærari, sum hevur ein sætta flokk, ið hevur givið egnar yrkingar út.

Fleiri samrøður eru við og um næmingaráð, eitt nú við Anne Mette Friis, lærara og starvsfólk hjá UNICEF í Danmark, sum hevur havt verkstovur við næmingaráðum í Føroyum. Fríðbjørg S. Hammer og Andrias Magnussen, sum eru varaskúlastjórar í ávikavist Kollafirði og Fuglafirði, greiða frá týdninginum at hava næmingaráð, og tað gera nakrir næmingar úr Kollafjarðar og Fuglafjarðar skúla eisini. “Lærarar lurta eftir okkum,” siga teir.

Samrøða er eisini við Biritu Kjærbo, sum hevur tvey børn við ADHD. “Skúlin hevur gjørt eitt stórt arbeiði fyri at fáa at trívast.” Ein sólskinssøga um ADHD í skúlanum.