Í blaðnum hesa ferð:

Í blaðnum hesa ferð er samrøða við Elin Mariu Ó. Olsen, lærara, um góða kvæðaundirvísing í skúlanum; við Eyðnu Magnussen, skúlastjóra, um nýggju tvílæraraskipanina, sum er sett í verk í allari grunddeildini í Eysturskúlanum í nærum øllum tímum, og sum stórar vónir eru til; við Maluna H. Heinesen, Elsu Mariu Lorentzen og Beintu P. Jacobsen, lærarar, um barnakórini á Skúlatrøð, har øll eru vælkomin; við Ásbjørn Berthelsen, lærara, um hvat lærarin og skúlin gera rætt; við Eyðdis Eidesgaard, fyrrverandi lærara og skúlastjóra, um, hvat hevur eyðkent skúlan hennara drúgva skúlalív, og við Heina Gaard, leiðara á Mentamáladeildini hjá Tórshavnar kommunu, um skúlaviðurskifti í høvuðsstaðnum nú og í framtíðini.

Umrøða er av nýggja tilfarinum hjá Námi til undirvísingina í føroyskum sum annaðmál, Leyp, sum Andriása Dam Joensen, hevur gjørt, av uttanlands starvsfólkaferð hjá lærarum í Gula skúla, av fyrstuhjálparskeiði, sum Reyði krossur bjóðar næmingum í sjeynda flokki, og av evnisdegi, sum verður síðst í hesum mánaðinum við Louise Klinge, skúlagranskara.