Børn eiga at duga at svimja
Tórbjørn Jacobsen, borgarstjóri í Runavíkar kommunu, heldur, at tað er løgið at byggja skúlar í dag fyri fleiri hundrað milliónir, uttan at møguleikin hjá skúlabørnum at sleppa at læra at svimja er til02.05.2018
Torbjørn Jacobsen er formaður í eldrasamtakinum ímillum Runavíkar kommunu, Sjóvar kommunu og Nes kommunu. Á ellisheiminum í Runavík vóru tey somikið framsíggin fyrst í sjeytiárunum, at tey gjørdu ein svimjihyl.
So kom henda tíðin við hesi kreppuni, sum vit í Føroyum kanska ikki merktu so øguliga nógv til í 2008, men tá tóku tey og lótu av sparingum henda svimjihylin aftur, og spurt varð, hví skuldi akkurát svimjihylurin sparast burtur.
- Tað varð gjørt, og sum so ofta í Føroyum, hylurin varð ikki latin uppaftur, so eitt tað fyrsta, eg setti mær fyri, tá ið eg gjørdist formaður í eldrasamtakinum, varð at lata henda svimjihylin uppaftur, sigur Tórbjørn Jacobsen, borgarstjóri.
Í Runavíkar kommunu eru tey nú farin at fyrireika seg so mikið nógv, at frá 1. januar 2019 er tann svimjihylurin opin aftur.
Eitt annað mál, ið hevur verið arbeitt við í kommununi síðan miðskeiðis í sekstiárunum, er at byggja eina svimjihøll. Tey gróvu út longu í 1964 ella -65 omfyri tann gamla skúlan á Glyvrum, langt áðrenn Skúlin við Løkin kom.
- Tað stendur so sum eitt opið sár har, so hendi einki meir, og tað er einki hent, og kanningar vísa tað, at skúlabørnini í Runavíkar kommunu eru tey, sum eru nógv ringast fyri í Føroyum, tá ið tað kemur til svimjing – nógv ringast!
Tórbjørn Jacobsen vaks upp í Gøtu, og í Gøtu skúla var tað eitt fak at læra at svimja. Har var ein svimjihylur beint omanfyri skúlan við Gøtugjógv, men tá ið hann kom út á Glyvrar at ganga í skúla nakað út í 2. flokk, var hann tann einasti næmingurin í einum flokki upp á 30 næmingar, ið dugdi at svimja.
- So illa stóð til her á leiðini; tað er kanska blivið frægari, men tað er so øgiliga langt frá, at tað er góðtakiligt.
Borgarstjórin sigur, at í hansara kommunu hava tey eina samtykt í býráðnum at fara undir at byggja eina svimjihøll beint við síðuna av Skúlanum við Løkin, sum er í tí samlaða økinum, har tey hava fimleikahøll, fótbóltsvøll, ítróttarhøll. Altso, svimjihøllin fer at standa mitt í hesum deplinum. Tað er komið hartil, at tey, uttan at hava tosað so nógv um tað í eini tvey ár. Jú, tey tosa nógv her um vegir, men tey tosa ongantíð um tað, sum tey ætla at fáa í pottin, fyrr enn tað er í pottinum.
Tað, sum nú er farið í gongd í Runavíkar kommunu er sambært borgarstjóranum tað, at ein arkitektakapping verður útskrivað í næstum.
- Og vit miðja eftir at vera komin so mikið langt, tá ið 2018 er runnið, at tað ber til at skriva undir ein sáttmála við ein byggiharra at smíða eina svimjihøll í Runavík á ítróttarøkinum, sigur Tórbjørn Jacobsen.
Hann veit við vissu, at tað verður í hvussu so er teknað soleiðis, at tað verður tann frægasta svimjihøllin í landinum. Millum annað verður sjálvur hylurin 25 metrar langur, men við átta geilum. Tað er tvær geilir fleiri enn í Havn fyri at gera tað møguligt hjá bæði ítróttarfólki, borgarum yvirhøvur og ikki minst skúlabørnum at svimja í, at læra at svimja í og at kappast í, tí har verða fleiri hylar í rúmsáttari høll.
So at samanumtikið verða skúlabørnini í Runavíkar kommunu, ið eru ringast fyri, tá ið tað ræður um svimjing, kanska best fyri í øllum landinum.
Tað er í hvussu so er eitt veldugt lop av vippuni.
Myndatekstur:
Tórbjørn Jacobsen, borgarstjóri í Runavíkar kommunu, sigur, at ein arkitektakapping verður útskrivað í næstum um at byggja eina svimjihøll í Runavík mitt á ítróttarøkinum, so at skúlabørnini í Runavíkar kommunu, ið eru ringast fyri í øllum, tá ið tað ræður um svimjing, kanska verða best fyri í so máta
Tekstur og mynd: Sonne Smith
